UMPASA

HATA UMPASA


Ompu Raja Ijolo martungkothon siala gundi,
Angka nauli pinungka ni angka ompungta naparjolo
Siihuthonon ni hita na parpudi.


Sada silompa gadong dua silompa puli
Molo tung Bapa Rali pe namanghatahon
Sude ma Pomparan Tuan Marruji dapotan uli

Ingkon sada do songon dai ni aek
Unang mardua songon dai ni tuak

Aek godang tu aek laut,
Dos ni roha sibaen na saut.

Tuat si puti, nakkok sideak,
Ia i na ummuli, ima ta pareak.

Sinuan bulu sibahen nalas
Sinuan  uhum sibahen na horas.


UMPASA NI NAPOSO BULUNG

Jolo tiniktik sanggar laho bahenon huru-huruan,
Jolo sinukkun marga asa binoto partuturan.

Tudia ma luluon da goreng-goreng bahen soban,
Tudia ma luluon da boru Tobing bahen dongan.

Metmet dope sikkoru da nungga dihandang-handangi,
Metmet dope si boru da nungga ditandang-tandangi.

Torop do bittang di langit, si gara ni api sada do
Torop do si boru nauli, tinodo ni rohakku holoan ho do

Molo adong huling huling adong do disi holi holi
Molo adong boru naso muli adong do dolo doli naso mangoli.

Rabba na poso, ndang piga tubuan lata
Hami na poso, ndang piga na umboto hata

Manuk ni pealangge hotek-hotek laho marpira
Sirang na mar ale-ale, lobianan matean ina.


UMPASA TU NA MARHASOHOTAN

Binuat bulu godang bahen sige, dalan ni paragat
Adong anak magodang marhot ripe, naeng ma dibagasan adat.

Dakka ni arirang, peak di tonga onan,
Badan muna naso jadi sirang, tondi mu marsigomgoman.

Giring-giring ma tu gosta-gosta, tu boras ni sikkoru,
Sai tibu ma hamu mangiring-iring, huhut mangompa-ompa anak dohot boru.

Rimbur ni Pakkat tu rimbur ni Hotang,
Sai tudia pe hamu mangalakka, sai tusima hamu dapot pansamotan.

Dekke ni sale-sale, dengke ni Simamora,
Tamba ni nagabe, sai tibu ma hamu mamora.

Sahat-sahat ni solu, sahat ma tu labuan,
Sahat ma hamu leleng mangolu, jala sai di dongani Tuhan.

Sahat solu, sahat di parbinsar ni ari,
Leleng ma hamu mangolu jala di iring-iring Tuhan ganup ari.

Mangula ma pangula, dipasae duhut-duhut
Molo burju marhula-hula, dipadao mara marsundut-sundut.

Ruma ijuk tu ruma gorga,
Sai tubu ma anakmuna na bisuk dohot borumuna na lambok marroha.

Anian ma pagabe tumundalhon sitodoan,
Arimu ma gabe molo marsipaolo-oloan.

Gadu-gadu ni Silindung, tu gadu-gadu ni Sipoholon,
Sai tubu ma anakmuna 17 dohot borumuna 16.

Andor hadukka ma patogu-togu lombu,
Sai sarimatua ma hamu sahat tu na patogu-togu pahoppu.



UMPASA SIJALO TINTIN MARANGKUP

Amak do rere, dakka do dupang 
Anak do bere, Amang do Tulang.

Bulung namartampuk, bulung ni simarlasuna,
Nunga hujalo hami tintin marangkup,
Dohonon ma hata pasu-pasuna

Hot pe jabu i, tong doi margulang-gulang
Sian dia pe mangalap boru bere i, tong doi boru ni Tulang.

Sai tong doi lubang nangpe dihukkupi rere,
Sai tong doi boru ni Tulang, manang boru ni ise pei dialap bere.

Asing do huta Hullang, asing muse do huta Gunung Tua,
Asing do molo tulang, asing muse do molo gabe dung simatua.


UMPASA NA MARDONGAN SAHUTA

Dolok ni pangaloan hatubuan ni hau toras
Na masipaolooloan do mambahen gabe jala horas
Sambilma tartondong dapotan ampapaluan
Asa denggan martondong unang masipamaluan

Tinallik landorung mangihut bottar gotana
Sisada hasuhuton do na mar dongan sahuta
Nang pe legan legan margana.

Pitu lobbu jonggi marholang holang hotang
Raja panuturi raja pandapotan do raja dongan sahuta.

Balintang ma pagabe tumandalhon sitadoan
Saut ma angka ianangkonta i gabe ai nungnga saut hita masipaolooloan

Aek Sihurukhuruk tu silanlan aek Toba
Ndang adong be na marungutungut, nungnga sude hita marlas ni roha

Simbora gukguk rarak diatas amak
Mamora ma hita huhut, torop ma boru dohot anak

Dolok ni pangaloan hatubuan ni hau toras
Na masipaolooloan do mambahen gabe jala horas

Marasar ma binsusur di ramba di robean
Asa denggan martutur, naeng ma masipaunean

Poltak bulan i Ama ni Manggule
Ro nuaeng angka pomparanmu mamboan sipanganon
Ba dohot hami maulae

Tubu ma singkoru di dolok ni Simamora
Sai torop ma anak dohot boru na basa jala sisubut roha

Tubu dingindingin jonok tu simartolu
Horas ma tondi madingin pir tondi matogu
Sai ro ma nipi na uli sai leleng hamu mangolu
Haliangan ni nono dohot nini raphon anak dohot boru


UMPASA MANGAMPU

Asa ampu di simajujung nami,
Tuak di abara nami
Jala ampe di abingan nami.

Turtu ninna anduhur, tio ninna lote,
Angka pasu-pasu pinasahat muna,
Sai unang ma muba, unang mose.

Bulung ni Taen tu bulung ni Tulan
Ba molo tarbahen, sai topot hamu hami sahali sabulan,

Molo so boi bulung ni tulan, pinomat bulung ni salaon,
Ba molo so boi sahali sabulan, pinomat sahali sataon.

Ni durung si Tuma laos dapot Pora-pora.
Molo mamasu-masu hula-hula mangido sian Tuhan,
Napogos hian iba, boi do gabe mamora.

Songgop si Ruba-ruba tu dakka ni Hapadan,
Angka pasu-pasu na ni lehon muna,
Sai dijangkon tondi ma dohot badan.

Mardakka Jabi-jabi, marbulung ia si Tulan
Angka pasu-pasu na pinasahat muna,
Sai sude mai dipasaut Tuhan.

Naung sampulu sada, jumadi sampulu tolu,
Angka pasu-pasu pinasahat muna,
Sai anggiatma padenggan ngolu-ngolu.

Naung sapulu pitu, jumadi sapulu ualu,
Angka pasu-pasu pinasat muna hula-hula nami,
Diampu hami ma di tonga jabu.

Habang pidong sibigo, paihut-ihut bulan,
Saluhut angka na tapangido, sai tibu ma dipasaut Tuhan.

Obuk do jambulan, nidandan ni boru Samara
Pasu-pasu na mardongan tangiang sian hula-hula,
Mambahen marsundut-sundut soada mara.

Tinapu bulung nisabi, baen lompan ni pangula
Sahat ma pasu-pasu na nilehon muna i tu hami,
Sai horas ma nang hamu hula-hula.

Suman tu aek natio do hamu, riong-riong di pinggan pasu,
Hula-hula nabasa do hamu, na girgir mamasu-masu.


UMPASA LAHO MARSIRANG

Dolok ni Panampahan, tondongkon ni Tarabunga
Sai horas ma hamu dipardalanan songoni dung sahat tu inganan muna

Pidong sitapitapi, habang diatas hauma
Horas ma hamu na hupaborhat hami
Horas hami na tininggalhonmuna

Tombak ni Sipinggan di dolok ni Sitapongan
Di dia pe hita tinggal, sai tong ma hita masihaholongan


Mangerbang bungabunga, ditiur ni mata ni ari
Selamat jalan ma dihamuna, selamat tinggal ma di hami

Eme sitambatua parlinggoman ni siborok
Amanta Debata do silehon tua, sai luhutna ma hita diparorot


UMPASA NI PANGULA, PEGAWAI, PARTIGA-TIGA

Disi do gandina, disi do nang gandona
Disi do daina disi do nang tabona
Sirsir ansimna jala hona dohot asomna

Asa dohonon nami ma :
Bagot na marhalto ma di ladang ni Panggabean
Horas ma hami na manganhon, lam martamba sinadongan di hamu na mangalean

Ia siula tano do hamu ba on ma dohononnami :
Binanga ni Sihombing binongkak ni Purbatua
Tu sanggar ma amporik tu lombang ma satua
Sai sinur ma pinahan gabe na niula

Molo partigatiga do hamu ba on ma dohonon namu :
Tinampul bulung bira bahen saong laho tu ladang
Sai mangomo ma hamu sian tigatiga ba sai maruntung ma sian dagang

Molo tung sipata rugi hamu ba sai dapot nian nidok ni umpasa :
Soban rantingranting soban ni Sijamapolang
Ba molo rugi hamu sian antinganting, ba sai mangomo ma sian golang

Molo pegawai do hamu ba on ma dohonon nami :
Tinapu bulung salaon dongan ni bulung si tulan
Ba sai naek pangkat ma hamu ganup taon, sai tamba gaji tiap bulan

Molo adong di hamu na so hot ripe dope on ma dohonon nami:
Parik ni Lubutua hatubuan ni bulu duri
Na burju marnatuatua sai ingkon dapotan rongkap na uli

Sahatsahat ni solu ma sahat di rondang ni bulan
Sai leleng ma hamu mangolu jala sai dipasupasu Tuhan



UMPASA TINGKI MANGAPULI

Ramba ni Sipoholon marduhutduhut sitata
Las ni roha dohot sitaonon sude do i sian Amanta Debata
 
Hau ni Gunungtua, dangkana madaguldagul
Tibu ma dilehon Tuhanta dihamu tua, jala tibu hamu diapulapul

Poltak bulan tula, binsar ia mata ni ari
Tibu ma ro tu hamu soritua, singkat ni sori ni ari

Hotang binebebebe, hotang pinilospulos
Unang iba mandele, ai godang do tudostudos

Hotang benebebebe, hotang ni Siringkiron
Unang iba mandele, ai godang dope sihirimo

Dolok ni Simalungun ma tu dolok ni simamora
Sai salpu ma angka na lungun, hatop ma ro silas ni roha


UMPASA NA MARHATA SINAMOT

Sai jolo dinangnang do asa dinungnung
Sai jolo pinangan do asa sinungkun

Burukburuk ni durung, parasaran ni sioto
Bangkona do manungkun, molo so binoto

Barita ni lampedang mardangka bulung bira
Barita ni hamoraon muna tarbege do ro didia

Pitu do nang lilinami, paualu ugianami
Na uli do nang nipinami, ai gohanmuna ma nuaeng hajutnami

Madekdek ansoit tongon tu tarumbara
Unang dok hamu hami parholit, silehonon do soada

Niluluan tandok hape dapot parindahanan
Tolap pamangan do nian mandok, alai ndang tuk jamaon ni tangan

Sai tu ginjang ninna porda, sai tu toru do pambarbaran
Sai naeng mamora do nian dipangido roha
Hape sai hapogoson do dilehon sibaran

Tubu antaladan jonok tutadatada
Hansit do rajanami tangan mandanghurhon na soada

Songgop siruba ruba tu dangka ni ansoit
Ai anggo tu hula hula ndang boi iba mangholit

Tombak di dolok dolok hatubuan ni suga suga
Na mandanggurhon tu dolok do na mangalehon tu hula hula

Nidurung situma laos dapot pora pora
Molo buas iba tu hula hula, na pogos hian iba ingkon gabe mamora

Tubu hau toras di dolok ni Sitapongan
Ingkon gabe do hita jala horas molo masipaolo

Duru duru ni huta panuanan ni salaon
Pnagidoan ni hula hula, dao do i juaon


UMPASA MAMONGOTI BAGAS 

Mardangka bulung bira, martampuk bulung labu
Mauliate ma di Tuhanta ai nungnga tipak hamu marjabu

Tubu ma simarlasuna, lata ni tobu di holangholangna
Sai hot ma jabunta on di batuna jala togu di hajongjonganna

Marmutik ma tabutabu dompak mata ni ari
Gok ma jolma di jabu jala gok ma uang di lamari

Panggu do panggisgis, pangko ni bagot bahen hauna
Jabunta on ma na so ra tiris, huhut na togu di batuna

Tubu ma salaon di topi ambar Sihoruhoru
Jabu na uli ma jabuntaon, hatubuan ni anak dohot boru

Duru ni hauma panuanan ni sanggesangge
Sahat ma hamu saurmatua mangingani jabunta on huhut horas jala gabe

Andor has ma tu andor ris tu andor ni Purbatua
Sai horas ma hamu sai torkis mangingani jabunta on, gabe jala saurmatua


UMPASA NA ASING  

Mandurung di aek Sihoru-horu, manjala di aek Sigura-gura,
Udur ma hamu jala leleng mangolu, hipas matua sonang sora mahua.

Martahuak ma manuk di bungkulan ni ruma,
Horas ma hula-hulana,songoni nang akka boruna.

Simbora ma pulguk, pulguk di lage-lage,
Sai mora ma hita luhut, huhut horas jala gabe.

Hariara madungdung, pilo-pilo na maragar,
Sai tading ma na lungun, ro ma na jagar.

Eme ni Simbolon parasaran ni si borok,
Sai horas-horas ma hita on laos Debata ma na marorot.

Pinasa ni Siantar godang rambu-rambuna,
Tung otik pe hatakki, sai godang ma pinasuna.

Napuran tano-tano rangging marsiranggongan,
Badan ta i padao-dao, tondita i marsigomgoman.

Marmutik tabu-tabu mandompakhon mataniari,
Sai hot ma di hamu akka pasu-pasu, laho marhajophon akka na sinari.

Bona ni pinasa, hasakkotan ni jomuran,
Tung aha pe dijama hamu, sai tong ma dalan ni pasu-pasu.

Dolok ni Simalungun, tu dolok ni Simamora
Salpu ma sian hamu na lungun, sai hatop ma ro si las ni roha.


Urat ni eme tu laklak ni simarlasuna, Adat na denggan na so ra sega, uhum na uli na so ra muba,
Asa manumpak ma Tuhanta, sinur ma pinahan gabe na niula, mangomo partiga tiga.

Martumbur ma baringin, mardangka ma hariara,
Matorop ma hamu maribur, matangkang ma juara.

Sai marrongkap mai songon bagot, marsibar songon ambalang,
Sai masigomgoman ma tondi pasu pasuon ni Tuhan.

Dangka ni hariara ma pinangait-ngaithon,
Tubuma dihamu anak dohot boru, sai unang ma panahit-nahithon.

Balintang ma pagabe tumandakhon sitadoan,
Saut do hamu gabe asal ma tontong masipaolo-oloan.

Ai na tinapu salaon, salaon situa-tua,
Denggan ma hamu masianju-anjuan asa saut gabe jala sarimatua.

Sai situbu laklak ma hamu situbu singkoru di dolok ni purbatua,
Sai tubuan anak ma hamu tubuan boru, donganmuna sarimatua.

Hariara na bolon bahen parlape-lapean,
Sai tubu ma di hamu anak dohot boru na bolas pangunsandean.

Bagot na mandung-dung tu pilo-pilo marajar,
Tading ma antong na lungun, sai roma na jagar.

Muba dolok muba duhutna,
Muba luat muba do adatna.

Sori manungkun sori mandapot,
Sai matua marpanungkun tu na nidapot.

Tangan do botohon, ujungna jari-jari,
Bangko nihata si dohonon, asal ma jumolo marsatabi.

Tampuk ni sibaganding di dolok ni pangiringan,
Horas ma hamu na marhaha maranggi, sai masipairing-iringan.

Bola-bola ni tangan, sitongka i bolahononhon,
Bola-bola ni halak, sitongka i tangihononhon.

Tinallik randorung bontar gotana,
Dos do anak dohot boru nang pe pulik margana,

Dompak marmeme anak, dompak do tong marmeme boru,
Andung ni anak sabulan di dalan, andung ni boru sataon.

Tampulan sibaganding
Diatas na pangiringan
Tugabenama hamu saluhutna
Tondi muna sai masipairing-iringan

Sinuan hariara bahen partungkoan di tonga ni huta
Sinur ma napinahan tugabena naniula
Nadihuta unang marmara
Horas-horas ma hamu Sasude tumpakon ni Tuhanta Namartua

Tangki ma jala walang
Galinggang jala garege
Tubu ma anak partahi jala ulu balang
Dohot boru maduma jala pareme

Tubu ma sanggar di holbung-holbung
Tubu arung di honuk-honuk
Tubu ma dihamu anak namalo marpollung
Dohot boru namalo marsonduk

Tubuan lak-lak tubuan singkorung
Di dolok ni purbatua
Tubuan anak tubuan boru
Dongan muna saur matua

Andor ris ma andor ras
Didolok ni lobutua
Torkis-torkis ma horas-horas
Jala dapotan tua

Pinantingkon hujur
Tu julu ni topian
Horas ma hamu saluhut
Jala dapotan pancarian

Bagol namadungdung
Tupilo-pilo namarajar
Dao ma nalungun
Sai ro ma na jagar tu joloan on

Bagol bogil
Bagol so habal-balan
Salpu ma nahansit
Sai ro ma najagar tujoloan on

Balintang ma pagabe
Tumundalhon sitadoan
Ari mu ma gabe
Asal ma hamu masipaolo-oloan

Diruma Pohki
Bahul-bahul pansalongan
Pir ma tondi
Jala luma panamotan

Dangka ni sitorop
Pinanghait-haithon
Tubu ma anak dohot boru
Sitongka panahit-nahiton

Eme si tamba tua ma parlinggoman ni si borok
Amanta Debata do Si lehon tua
saluhut na ma hitaon diparorot.

Hotang binebebebe
Hotang pinoluspolus
Unang hamu mandele
Ai godang do tudos-tudos

Pinatikkon ni hujur ma inna sahat ma tu topian
Sai tudia pe hita mangalakka, sai tusi ma dapot parasian

Habang pidong sibigo, paihut-ihut bulan,
Saluhut angka na tapangido, sai tibu ma dipasaut Tuhan.

Dekke ni sale-sale, dengke ni Simamora,
Tamba ni nagabe, sai tibu ma hamu mamora.

Mangula ma pangula, dipasae duhut-duhut
Molo burju do hita marTuhan, dipadao mara marsundut-sundut

Tep tep di ninna mula ni godang
Ser ser do ninna mula tortor
Sungkun mula ni uhun
Sise mula ni hata

Danggur ma danggur barat
Danggur tu duhut duhut
Nunga bosur hita na mangan
Mahap marlompan juhut
Ba boaboana dipaboa amanta suhut

Sai jolo ninangnang do asa ninungnung
Sai jolo pinangan do asa sinungkun
Dia ma nuaeng langkatna dia ma unokna
Dia ma hatana dia nidokna

Godang sibutong-butong, otik sipir ni tondi
Pamurnas ma i tu pamatangamuna, saudara tu bohi

Sititi ma sihompa golang-golang pangarahutna
Tung sadia pe i nuaeng, tung godang ma pinasuna.

Binanga ni Sihombing, na binongkak ni Tarabunga,
Tu sanggar ma amporik, tu lubang ma satua,
Sinur ma pinahan, gabe na niula.

Bona ni aek puli di dolok ni sitapongan.
Sai tubu ma di hamu angka na uli

Sai lam tamba manang pansamotan
Ranting ni bulu duri jait masijaotan
Siangkup ni na uli, dia ma nuaeng sitaringotan

Pitu lilina paualu jugiana
Na uli do nipina ala dijangkon borumuna do anaknami

Ndang tuktuhan batu, dakdahan simbora
Ndang tuturan datu, ajaran na marroha

Pat ni gaja do hamu tu pat ni hora
Anak ni raja do hamu, pahompu ni na mora

Barita ni lampedang na solot di bulung bira
Barita ni raja i sahat/targebe do rodi dia.

Lubuk sigura-gura denggan do panjalaan
Nunga sai mangigil hula-hula, olat ni na boi ba tinambaan.

Durung do boru, tomburan hula-hula
Ingkon do porsanon ni boru, siporsanon ni hula-hula

Nidurung pora-pora ala so adong be sibahut
Naeng mangarupi ninna roha, hape so ada isi ni hajut.

Hudali ni pangula sinimpan dipara-para
Molo nioloan hata ni hula-hula sai dao ma nasa mara

Pusuk ni jabi jabi tu bulung ni simarlasuna
Tung otik pe sinamot na husombahon hami,
Sai godang ma pinasuna.

Lasiak na rata binahen tu panutuan
Raja pe na raja, sai suhut do sibahen putusan.

Tangkas ma ninna uju purba, tumangkas ma uju angkola
Tangkas ma na maduma, ba tumangkasanma nang mamora.

Bintang torang diborngin nabadia
Dok torus terang jangan ada dusta diantara kita.


diolah dari berbagai sumber
HOLONG HUTAGAOL papa rali